સુરત : સેન્ટ થોર્મસ સ્કુલ પાસે બિલ્ડરની ઓફિસમાં તસ્કરો ત્રાટક્યા

ઉમરા પોલીસ મથકની હદમાં આવેલ ન્યુ સિટીલાઈટ રોડ પર સેન્ટ થોર્મસ સ્કુલ પાસે બિલ્ડરની ઓફિસમાં ત્રાટકેલા તસ્કરો અડધા કલાકમાં જ લાખોની ચોરી કરી ભાગી છુટ્યા હતાં. તો ચોરી પાછળ જાણભેદુ હોવાની શંકા સેવાઈ રહી છે.
ખટોદરા પોલીસ પાસેથી મળતી માહિતી મુજબ બિલ્ડર ગોપાલ ડોકાણીના મહેન્દ્ર રાઠીના મેનેજર એ નોંધાવેલી ફરિયાદમાં જણાવ્યુ હતું કે તેઓ ન્યુ સિટીલાઇટ રોડ પર સેન્ટ થોર્મસ સ્કુલની બાજુમાં ઓફિસ ધરાવે છે અને તેઓની ઓફિસમાંથી માત્ર 30 મીનિટમાં જ રૂપિયા 90 લાખ રોકડની ચોરી થઈ હતી. તેમણે જણાવ્યું હતું કે, તસ્કરો મોઢા પર માસ્ક પહેરી ચોરી કરવા માટે આવ્યા હતા. પોલીસે ઓફિસના સીસીટીવી ફૂટેજના આધારે તપાસનો દૌર શરૂ કર્યો છે. ટૂંકમાં કોઈ જાણભેદુએ ચોરીને અંજામ આપવા કોઈને ટીપ આપી ચોરી કરાવી હોય એવી પોલીસને આશંકા લાગી રહી છે. સૌથી નવાઇની એ છે કે, રવિવારે રાત્રિના 8.15 વાગ્યે ચોરી થઈ ત્યારે ઓફિસ ખુલ્લી હતી અને લગભગ 10 થી 15 કર્મીઓ કામ કરતા હતા છતાં બન્ને ચોરોએ પાછલા દરવાજાથી પ્રવેશી 30 મીનિટમાં જ ચોરી કરી નીકળી ગયા હતા અને ચોરી અંગે કોઈને ગંધ પણ આવવા દીધી ન હતી. બન્ને ચોરોએ બિલ્ડરની ઓફિસમાં પાછલા દરવાજાથી ઘુસીને અંદર આવી ટેબલના ડ્રોઅરમાંથી સેઇફ લોકરની ચાવી લીધી હતી પછી સેઇફ લોકરમાંથી 90 લાખની રોકડ ચોરી કરી ગયા હતા. તો બિલ્ડર ગોપાલ ડોકાણીના સ્ટાફે સોમવારે સવારે આવી સેઇફ લોકર ખોલ્યું તો અંદરથી રૂપિયા 90 લાખની રોકડ રકમ ગાયબ હતી. જેથી ઓફિસ સ્ટાફે સીસીટીવી કેમેરાની તપાસ કરી જેમાં રવિવારે રાત્રિના સમયે 90 લાખની રોકડ ચોરી થઈ હોવાની ખબર પડી હતી. હાલ તો ખટોદરા પોલીસે લાખોની ચોરી મામલે ગુનો નોંધી વધુ તપાસ હાથ ધરી છે.